Bhí vótaíocht ag an reifreann ar siúl Dé hAoine, 11ú Meitheamh, 1999 idir 8 a.m. agus 9 p.m. Bhí toghcháin do Pharlaimint na hEorpa agus d’údaráis áitiúla ar siúl ar an lá céanna.
Rinneadh cur síos ar ábhar an reifrinn mar seo a leanas sa chárta vótála oifigiúil a seoladh chuig gach toghthóir:
Molann 'AN BILLE UM AN FHICHIÚ LEASÚ AR AN mBUNREACHT (Uimh. 2), 1999, an tAirteagal seo a leanas a chur isteach i ndiaidh Airteagal 28 den Bhunreacht:
"Airteagal 28A RIALTAIS ÁITIÚIL
1. Aithníonn an Stát ról an rialtais áitiúil maidir le fóram a sholáthar d’ionadaíocht dhaonlathach na bpobal áitiúil, le linn cumhachtaí agus feidhmeanna a thugtar le dlí a fheidhmiú agus a chomhlíonadh ar an leibhéal áitiúil agus leasanna na bpobal sin a chur chun cinn trína thionscnaimh.2. Beidh cibé údaráis áitiúla dhírthofa ann a chinnfear le dlí agus, faoi réir fhorálacha an Bhunreachta seo, déanfar a gcumhachtaí agus a bhfeidhmeanna a chinneadh amhlaidh agus oibreofar agus comhlíonfar iad de réir dlí. 3. Comórfar toghcháin do chomhaltaí na n-údarás áitiúil sin de réir dlí tráth nach déanaí ná deireadh an chúigiú bliain tar éis na bliana is déanaí a tionóladh iad. 4. Gach saoránach ag a mbeidh ceart vótála i dtoghchán do chomhaltaí Dháil Éireann agus cibé daoine eile a chinnfear le dlí beidh ceart vótála aige i dtoghchán do na comhaltaí sin de na húdaráis áitiúla dá dtagraítear in alt 2 den Airteagal seo a chinnfear le dlí. 5. Déanfar corrfholúntais i gcomhaltas údarás áitiúil dá dtagraítear in alt 2 den Airteagal seo a líonadh de réir an dlí”.'Ba é 1,024,850 líon iomlán na vótaí a taifeadadh i bhfabhar an togra agus ba é 291,965 líon iomlán na vótaí a taifeadadh i gcoinne an togra. Toisc gur cheadaigh an pobal an moladh mar is ceart, shínigh an tUachtarán an Bille ar an 23ú Meitheamh, 1999 agus feidhmíodh é mar dhlí.
Achoimre ar an Toradh
| Toghthóirí: | 2,791,415 |
| Vótaíocht Iomlán: | 1,425,881 |
| Céatadán Vótaíochta: | 51.08% |
| Vótaí i bhfábhar an mholta: | 1,024,850 |
| Vótaí in aghaidh an mholta: | 291,965 |
| Páipéir Bhallóide Neamhbhailí: | 109,066 |